نتقابل

لنفترق

أخيرا

وبعد طول انتظار

وأربع سنوات من الشقاء والعذاب

ورغم جميع المحاولات لردعى وقهرى

تمكنت انا سمايلى

فى ساعته وتاريخه يوم الخميس 31/7/

2008

من أخذ

بكالريوس الاقتصاد والعلوم السياسيه

قسم العلوم السياسيه

شعبه اللغه الانجليزيه

بتقدير عام جيد

ما تسمعونى زغروطه بقى

:D:D

عدت سنه

سنه راحت بكل اللى فيها

كان فيها الوحش والحلو

كان فيها اللى جمبى واللى سبنى

كان فيها اول مدونه فى حياتى

شافت منى كتير

وشالت عنى أكتر

وعرفتنى على ناس اجمل

وقربتنى من ناس أكتر

بقولك النهاردة

"كل سنه وانتى جمبى وطيبه"

صحيح البيبسى والجاتوو والذى منه كله عند سابى

ومتنسوش تسيبوا الكادوهات عندها بردة هى مش هتخرج حد من المدونه الا اما يسلم هديته

congrulations my best best best friend

Nosayba :)

الحشيش.....مغليش

فى ظل الزياده المستمرة فى الاسعار واللى كلنا عارفينه وحاسينه, ورفع الدعم أو يدوب نص الدعم عن البنزين وزيادة الضرائب على العربيات......وبعيد عن انى الك كتير علشان كل البنى ادمين الحاملين للجنسيه المصريه عارفين الحجات دى ولو مش متأثرين هيصعب عليهم المتأثرين ماديا ومعنويا......وهى دى الاخوة فى الوطن

وأنا واعوذ بالله من كلمه أنا فى ساعه صفا ودا كان بعد ما اتفرجت على الوزير المبجل رشيد محمد رشيد ويريتنى ما اتفرجت عليه بس يفيد بايه الندم وبصراحه الراجل ميتوصاش جابلى اكتئاب خماسى والواحد ايام المذاكرة بيبقى محتاج شويه كأبه بردة يرطبوا الجو

وصرح سيادته وقال انى دى مش الحزمه الاولى فى ارتفاع الاسعار وفى حزم تانيه ان شاء الله_اللهى حزمه منهم تجيب اجله_وصرح ايضا ان دا الدواء للامراض اللى فى مصر وطبيعى الدوا بيكون مر شويه بس بيشفى

سؤال: هل حكومه نظيف بتاخد نفس الجرعه من الدوا اللى بياخده المصريين العاديين؟؟؟......(وش مش فاهم حاجه

ونتيجه لذلك الحقد الطبقى المتعفن ظهر عندى واعدت اقول طبعا ياعم وانت هتحس بالحزم دى ازاااااااااى وانت قاعد فى فيلا وعندى بودى جارد ببدل شيك وراكب عربيه مكيفه وبتمون ببلاش ....هتفرق معاك حزم بقى ولا نيله
وفى نفس لحظه الحقد الدفينه دى لقيت ان كل السلع الضروريه منها والاستهلاكيه زاد تمنها كلها بلا استثناء ....ولكن
لقيت حاجه مغليش تمنها.....وربنا ما لقيت غيره
اللى هو طبعا الحشيش
الحشيش يا ساده سلعه تمنها مزدش الايام دى ولا الايام اللى فاتت.....ليه؟؟.....سؤال دماغه بيطرحه كتير الايام دى
demandالمفروض انه منتج زى ما اخوانا فى اقتصاد بيقولوا ان ال

supply بتاعه الى حد ما عالى وبردة ال
بتاعه عالى جدا جدا جدا

فليه تمنه مزدش فى الاوضاع دى وتجار الكابتشينو مغلوش تمن قرش الكابتشينو ليه؟؟

يمكن دا لطف منهم بأحوال اخوانهم المصرييين......والله تبقى ناس كويسه:D

ولا يمكن دى رغبه من الحكومه علشان بتحب بردة تظبط دماغ الشعب أحسن ما ينفجر من اللى جواه المهم النتيجه واحدة

الحشيش......مغليش

ملحوظه رفيعه: لو حد تمن الحشيش عنده زاد يبلغ جهاز حمايه المستهلك....البلد مش سايبه

iN ciRclEs

ولا حاضر .......ولا ماضى

تروس بتلف على الفاضى



ولا فينا....شباب زعلان



ولا فينا شباب راضى



مفيش غير اننا بندوووور

ندوووووووووووووووور

ندووووووووووووووووور

((أوقات فراغ))

?!

cAn yOu liVe wiTh tiRed sOuL acCompAnieD by hiGh spiRiT?!

.

.

.

I CAN'T :(

sTp

السلام عليكم

والله وحشتنى المدونه والمدونين والمدونات الطلاب منهم والطالبات وبما انى دخلت خلاص فى الترم التانى وما ادراكوا الترم التانى دا بيكون ازاى فى فيبس.بعيد عنكوا مشروع التخرج بتاعى اكل دماغى بقيت بحلم بيه واقوم من النوم مفزوعه من كوابيس بردة منه لدرجه انى قبل اماانام بتجيلى افكار عن المشروع وبتبقى افكار جامدة واقوم من النوم والمثل المصرى الشهير"كلام الليل مدهون بزبده يطلع عليه النهار يسيح.واحاول واعصر فى دماغى انى افتكر ولا حياه لمن تنادى كله راح فى البلالا

والله يا جماعه انا من كتر ما بفكرفى المشروع بقيت ارسم علم اسرائيل فى كل حته على المخده فى الكتب اما بسرح مع روحى بيكون معايا بردة فى السرحان.اى حاجه عنيا بتقع عليها تتعلق باسرائيل دلوقتى اجرى ابوص عليها كانها مثلا ساندوتش كريب لسه جاى طازة

وبما انكم اصحابى بردة هقولكوا اسم المشروع بتاعى ومحدش يشتم او يزعل اويعمل اى حاجه

"قرارات الامم المتحده ازاء بناء المستوطنات الاسرائيليه فى الاراضى العربيه المحتله"

اللهم اعفنى من مشاريع التخرج واخرجنا منها سالمين .....اللهم امين

المهم انا جايه النهاردة بقى ليه وايه معنى عنوان البوست دا الا وهو sTp

كجزء من طبيعيه سمايلى البشريه انها تحب تكون مضغوطه وعليها زليون حاجه ويعدى عليها ايام يكون النوم بالنسبه ليها حلم وحلم كبير كمان.المهم sTp

دا من الانشطه الطلابيه اللى بقت مشهورة اوى فى جامعه القاهرة وهو موجود فى الاساس فى كليه هندسه القاهرة

فطبيعى سؤال واضح وصريح ومحدد يتسال دلوقتى يعنى ايه sTp

يعنى:steps towards progress

دا نشاط قام بفكرة واحد من هندسه لقى ان فى فرق كبيييييير جدا بين اللى احنا بندرسه فى الكليات واللى سوق العمل بيطلبه وان اننا اما بنتخرج مش بنكون مؤهلين للشغل فى مناطق محترمه الا اذا كان طبعا معاك كوسه قصدى وسطه

ففكر انه يعمل نشاط يعلم فيه الناس ازاى تحدد اهدافها الاول ازاى تبقى ايجابيه تبدا بنفسها وتنميها وبعد كدا تنقل اللى اتعلمته لغيرها

فبدا يعمل النشاط قبلته تحديات كبيرة جدا بس ما شاء الله عليه مش استسلم كمان كان معاه جروب مؤمن بفكرته راحوا شركات وواخدوا كورسات واتعلموا وقرروا ينقلوا اللى اتعلموه دا لغيرهم

sTp بدا من 3 سنين بس

بدا ب800 واحد فى السنه الاولى بعد كدا فى السنه التانيه بقوا 1500 وفى السنه التالته بقوا 3000 وطلع من الناس دى افكار زى sTp

وبقت انشطه جامدة جدا.sTp

مش اكتفى بس بطلاب الجامعات والانشطه بتعتهم بالعكس عمل محاضرات لطلبه اولى هندسه علشان الطلبه بتدخل مش بتكون فاهمه حاجه ولا عارفه تدخل اى قسم فبيحاولوا يفهموهم كل قسم بيتكلم عن ايه ويحاولوا يوجهوهم حسب رغبتهم

الناس دى بجد جامده يا جماعه والشباب دول احنا زينا زيهم مش يزيدوا عن اى حد فينا حد الا بس رغبتهم فى عمل شئ والتصميم انهم يعملواه للنهايه

مثل بسيط:قرروا انهم عايزين يجيبوا احمد زويل فى الافتتاح اما كان موجود فى مصر فضلوا يدوروا لحد ما جابوا نمرة المرافق له فى زيارته للقاهرة وهو مقدم برنامج الطبعه الاولى:احمد المسلمى

وقدروا يقابلوا د.احمد زويل واتكلوا معاه لمده ساعه وفرح اوى بيهم وهم كمان فرحو اوى انهم قدروا ينفذوا اللى هم عاوزينه

كمان عملوا sTP juniors

ودا نشاط لطلبه المدارس وبداوا بمدرسه دار التربيه(internationa section)

وعملوا فكرة اسمها Egypt's image

انهم يفكروا ازاى تكون صورة مصر فى عيونهم عايزين يغيروا ايه وايه شايفينه صح وايه غلط وازاى يغيروا الغلط دا

بجد واحنا فى opening sTp 08

ودا كان فى القبه الاتنين اللى فات طلع ولد عنده 17 سنه من المدرسه ماش الله عليه كان بيتكلم وهو واثق من نفسه جدا على الرغم انه كان اصغر واحد فى القاعه كان قاعد ادامه رئيس جامعه القاهرة ووكيل الجامعه والولد كان بيتكلم بشكل لائق وكله امل مش زى طلبه ثانوى تلاقى الواد يعينى مكفى على الكتاب ووسطه اتقطم من الاعده ولو قام يريح شويه يلاقى قفا نازل عليه من اى حد فى البيت علشان يعد يكمل دح علشان يجيب مجموع ويدخل جامعه محترمه اللى لحد دلوقتى لم اكتشف وجودها فى مصر ويدخلها ويدح بردة ويتخرج ليشتغل بعد

عذاب لا يمكن وصفه او يعد على اى قهوة مستنى القطر اللى عمره ما بيجى فى ميعاده

انا بجد قضيت ايام حلوة جدا فى sTp

مش متخيله ان فضلى بس 3 او 4 ايام ومش اشوف اصحابى هناك مش متخيله ان يوم السبت يجى عليا من غير ما انزل هندسه واعد هناك من 3 لحد 8 وشويه بنفكر ونلعب ونشتغل ياااااااااااااااه.انا بجد بدعى انى مش انسى الناس دى

اللى شجعنى انى اتكلم عن sTp

اننا كنا فى خروجه مع بعض كل sTp

يا جماعه خرجوا مع بعض وروحنا الازهر بارك مع بعض قليل اوى اللى مشى لوحدة حتى واحنا فى الطريق للبارك كنا بنتكلم فى حجات مش تافهه ولا هايفه ودخلنا البارك واعدنا نتصور ونجرى ونلعب والاهم من كدا ان محدش فى sTp

يعرف اكيد ال3000 كلهم بس الخروجه دى عرفتنى على بعض وعرفنا بعض اكتر وكانت فى لعبه فى الاخر ان كل تيم يألف اغنيه لsTp

ابداعات ظهرت والله يا جماعه لمجرد اننا عايزين نقول بس اننا بنحب sTp

انا بجد بشكر كل واحد وواحدة قدم sTp

بالشكل المحترم دا انا بجد مهما اوصفلكوا عمرى والله ما هقدر اوصف الناس دى تعبت اد ايه علشان تخلينا نستفيد وبجد عملوا اللى عليهم واكتر بكتيييييييييييير.ربنا يجازيهم خير على تعبهم دا ويوفقهم فى حياتهم ويحقق لكل واحد كل احلامه

انا هقول بس شكرا كبييييييييييييييييرة

Head sTp08 لاحمد الشرقاوى

Vice head محمود امبابى

and to my moderators:nora&ramez&ahmed&amira&sayd

كان نفسى بجد احط صورهم بس دا اختراق لخصوصيتهم وانا مش عايزة اخترق حد

انا طبعا طولت عليكوا كتير انا عارفه والله بس انا كان نفسى اقول حجات كتييييير على sTp

واللى قولته دا كلمه من بحر sTp

انا هختم باسماء workshops in sTp

CPR(mine):Crisi-project-risk management

BIS:Business initiation and sucsess

ERA:Economics of real-life application

IRA:Innovative realization for advertising

MAP:Marketing aspects& principles

OOP: Outstanding organizational performance

PROMAN:Project management

TAI:The art of innovation

UNIFIED:Unified engineering workshop

والاغنيه اللى الفتها مع التيم بتاعى فى الازهر بارك:D:D

استباويه احسن ناس

نشاطها فى الجامعه منور

مهندسين وشباب جدعان

مع بعض دايما بنطور

من حقنا نغير ورانا ايه ورانا ايه

مع بعض بنطور ورانا ايه ورانا ايه

استباويه يا استباويه

نشاطها جامد وميه ميه

كنا واحد وبقينا ميه

وكل ما دا فى زياده جايه

اه يالالى حبيبى يالالى يا رووووووحى يالالى

:D:D

for further info go to sTp's website http://cms.stp-egypt.com/index.php?option=com_frontpage&Itemid=1

بكاء

أبكيتنى يا حب أكثر من الكثير....أبكيتنى رغم أنك لم تلق منى أى تقصير....أبكيتنى يا حب ولم أبك قط من شيئا سواك

أبكيتنى وأنا بعيدة عنك ولم ألقاك....أبكيتنى عندما قررت أن أقترب منك....أبكيتنى وأنا اجمع أطلالى وأبعد عنك

أبكيتنى لكنى لم أطق فراقك....أبكيتنى ياحب وكأننى عدو لدود لك....أولست حبيب يحنو عليك ويتمنى ان تتصدق عليه ايضا بحنانك

أكبريائك تمنعك أن تتعطف على بحبك لى....أم أنك تحنو فقط على من يعطيك ظهره....وتقسو وتتجبر على من يتمنى لحظه رضاك

فهل لى الان بسؤال.......لم كل هذا البكاء؟؟

أيقترن البكاء دائما بالحب ؟؟ أم يقترن الحب دائما بالبكاء؟؟

ولكن ما الفائده من معرفه الاجابه ففى كلتا الحالتين النتيجه واحدة............بكاء

فلماذا جعلتنى يا حب أبكى وأنت تعلم قدر حبى....أتتلذذ برؤيه دموعى....أم تفخر برؤيه ضعفى

تعلم أن الله حرم القتل ولكن الان أعلنها وكلى ثقه وقوة ....ان قتل الحب مباااااح....مباح طالما سيحررنى من دموع تقيد عيناي....مباح طالما أحلم بوجودك وانت بجانبى....مباح اذا كنت يوم ستكون سبب فى قتلى

وقررت جديا ان اقتلك فما الذى يبقينى عليك....وقبل دقائق معدودة من قتلك أجدنى أتسائل....نعم لقد أذانى وجرحنى وذلك لمجرد حبى له

فهل هذا جزائى؟؟ ....أحببته ولم يعيرنى حتى اهتمامه .....نعم...لكن أنا لست هو

لذلك لن أجعلنى مثله سأتركه حتى يأتى يوما يعرف ما لم يكن يعرفه فى وقت مضى .....سأتركه حتى يتأكد انه اتى يوم وتجاهلنى كاننى شئ زهيد لا ثمن له.....ستأتى عليه تلك اللحظه التى يتمنى فيها ان يعود به الزمن حتى يرانى ويرى أننى لم اكن فقط أحبه بل اعشقه وعشقى نحت له تمثال يعبده .............وفى تلك اللحظه سأخذ نفسى بعيدا ....بعيدا عن الماضى وعنه وأحاول ان اعوضها ما فقدته وان اهديها ما تستحقه....ومن يحبها

تااااج رقم 2

بسم الله الرحمن الرحيم

فى الاول كدا بسلم على كل الناس واقولهم وحشتونى جدا خالص موت وبقالى كتير اوى مش بكتب حاجه ومش عارفه ايه السبب بصراحه بس كنت بكدب على روحى واقول انى مشغوله واه كنت مشغوله بس كان ممكن اكتب بردة....ما علينا المهم يارب تكونوا كلكوا كويسين وبخير وجود لاك ان شاء الله علشان بدانا الترم التانى ويارب يعدى بخير

بعد مشاورات ومناورات خدت نفس عميق وقررت انى اجاوب على التاج اللى مررته حبيبتى وصديقتى روفى وعلى الرغم انه تاج اسئلته جبارة جدا بس قولت لازم ولابد وحتما انى اجاوبه كفايه انه من رفرف:D

هل توافق على حذف خانة الديانة من البطاقة الشخصية ؟

مش معترضه على وجودها ولا معترضه على حذفها

المفروض ان التعامل مع الناس يكون بشكل طبيعى بدون تحيز دينى سواء مسلم او مسيحى دى فى المعاملات الرسميه

اما المعاملات الاجتماعيه مش محتاجه لبطاقه علشان اتعامل مع الناس المفروض التعامل مع البشر باعتبارهم ب ن ى ا د م ي ن

مش اديان

ما رأيك في المثليين ؟ هل ترى انها حرية شخصية ؟ هل توافق على الاعتراف بالمثليين ؟ هل لك اصدقاء من المثليين؟

مش فاهمه راى فيهم من اى زاويه بصراحه

طبعا حريه شخصيه لان كل انسان عارف ايه صح وايه غلط وقادر يحكم على نفسه وعلى ايه اللى يريحها بغض النظر هو ايه فى نظر الناس مش هنحاسب الناس كمان على اختيارتهم الجنسيه

اوافق لانهم اصلا موجودين اعتراضى او قبولى مش هيغير من واقع وجودهم

مليش اصدقاء ولا صادفت ناس منهم كويسه وينفعوا يكونوا اصدقاء ليا مش هعترض

هل تعتقد بوجود إضطهاد للمسيحين فى مصر؟

سؤال صعب

بس اعتقد الى حد ما لا لان المسيحين عايشين معانا وبيشاركونا نفس الواقع المرير اللى بنشوفه كل يوم وكل دقيقه.موجودين فى مناصب كتير دكاترة استاذة جامعين وحجات كتير اوى

لكن مرة قريت ان المسيحين مثلا مش مصرح لهم ببناء كنائس جديدة كالملسلمين وملهمش حق فى تجديد الكنائس القديمه الا بعض اجرائات معقدة جدا....بس فى راى ممكن علشان اعداد المسيحين مش فى تزايد متماثل مع تزايد المسلمين وبالنسبه للروتين مهو متفشى فى كل مكان فى مصر مش معنى دى يعنى

من هو الشخص الذى تختاره لرئاسة الجمهورية؟

بيتهيالى محدش مؤهل دلوقتى لرئاسه الجمهوريه غير شخص واحد بس لو كان اسمه مثلا جمال جرجس كانت ناس كتير تقبلته ووافقت عليه

اذا قمت بتأسيس حزب سياسي من هم الاشخاص الذين ستقوم بضمهم فى الحزب ليشاركوك الحكم حال فوزك فى الانتخابات؟

اممممممممممممممممم

هختار سعد زغلول رحمه الله

الجنزورى

طلعت حرب

ايمن نور

وكان نفسى اختار نساء سياسيات ليهم دور بارز فملقتش غير صفيه زغلول

هل توافق على مشاركة كل من الاخوان المسلمين و الاقباط فى الحكم؟

من حقهم يشاركوا فى الحكم بس بدون وجود اغلبيه لكلا الطرفين يعنى يكون حكم ائتلافى بينهم

في رأيك الشخصي ما هي اجمل مدونة قمت بزيارتها؟

يااااااااااه كتير اوى والله مدونين ومدونات كتير بجد مبدعين

بس فى مدونه برجعلها كل اما احس انى مضايقه ومخنوقه وبتابعها من بعيد لبعيد كدا هى

المدونه الكامييكازيه انسانه لصاحبتها ياسمين

هل توافقين على الزواج من رجل مطلق؟

والله حسب لو رجل بمعنى رجل ومناسب ليا سنا وخلقا وشخصيه يبقى معنديش مانع

إذا تزوجت و أنجبت ولدين و بنتين ؟؟ أى الاسماء تحب ان تسمىولدين وبنتين؟

هسمى الولدين:وحى ,أبى

ملحوظه(وحى بضم الواو وهى جمع كلمه وحى يعنى وحى + وحى+وحى__وأبى بردة بضم الالف وفتح الباء وسكون على الياء

والبنتين: سبيله وسلسبيل

هل تعتقد ان توريث الحكم فى مصر سيتم فعلا ام لا ؟

أينعم سيتم وبلا فخر

في رأيك الشخصي ما هو افضل إنجاز لحكومة مبارك ؟ و ما هو اسوء عمل قامت به ؟

فى الواقع:D

بيتهيالى كدا الكبارى عملتلنا بلد فوق البلد بصراحه وبردة محلتش ازمه المرور ودا انجاز فى حد ذاته

وبالذات انا وزملائى وزميلاتى اللى بنسافر كل يوم لكليتنا اشكر حكومه الرئيس علشان كوبرى قليوب اللى حل الازمه بتعتنا واحنا جايين القاهرة ونيلها تانى علشان بنعد ساعتين على نفس الكوبرى واحنا مروحين بيوتنا لانه بيتصلح...وعمار يا مصر

وبالنسبه لاسوء عمل فالعدد فى اللمون بصراحه متعدش:من ارتفاع معدل الفقر لارتفاع الاسعار لاحتكار الحديد لتفشى امراض الكبد والسرطان والاف بتموت كل يوم لاسباب لا تعد ولا تحصى ومحدش معير ....بس كدا واكيد انتوا عارفين الباقى

لمن تمرر هذا التاج؟

بصراحه اللى عايزة بالهنا والشفا

بس همرره للصديق والزميل أحمد زكريا صاحب مدونه ايوة شايفك

هو بيموت فى الاسئله دى هيفرح بيها اوى:D