بكاء

أبكيتنى يا حب أكثر من الكثير....أبكيتنى رغم أنك لم تلق منى أى تقصير....أبكيتنى يا حب ولم أبك قط من شيئا سواك

أبكيتنى وأنا بعيدة عنك ولم ألقاك....أبكيتنى عندما قررت أن أقترب منك....أبكيتنى وأنا اجمع أطلالى وأبعد عنك

أبكيتنى لكنى لم أطق فراقك....أبكيتنى ياحب وكأننى عدو لدود لك....أولست حبيب يحنو عليك ويتمنى ان تتصدق عليه ايضا بحنانك

أكبريائك تمنعك أن تتعطف على بحبك لى....أم أنك تحنو فقط على من يعطيك ظهره....وتقسو وتتجبر على من يتمنى لحظه رضاك

فهل لى الان بسؤال.......لم كل هذا البكاء؟؟

أيقترن البكاء دائما بالحب ؟؟ أم يقترن الحب دائما بالبكاء؟؟

ولكن ما الفائده من معرفه الاجابه ففى كلتا الحالتين النتيجه واحدة............بكاء

فلماذا جعلتنى يا حب أبكى وأنت تعلم قدر حبى....أتتلذذ برؤيه دموعى....أم تفخر برؤيه ضعفى

تعلم أن الله حرم القتل ولكن الان أعلنها وكلى ثقه وقوة ....ان قتل الحب مباااااح....مباح طالما سيحررنى من دموع تقيد عيناي....مباح طالما أحلم بوجودك وانت بجانبى....مباح اذا كنت يوم ستكون سبب فى قتلى

وقررت جديا ان اقتلك فما الذى يبقينى عليك....وقبل دقائق معدودة من قتلك أجدنى أتسائل....نعم لقد أذانى وجرحنى وذلك لمجرد حبى له

فهل هذا جزائى؟؟ ....أحببته ولم يعيرنى حتى اهتمامه .....نعم...لكن أنا لست هو

لذلك لن أجعلنى مثله سأتركه حتى يأتى يوما يعرف ما لم يكن يعرفه فى وقت مضى .....سأتركه حتى يتأكد انه اتى يوم وتجاهلنى كاننى شئ زهيد لا ثمن له.....ستأتى عليه تلك اللحظه التى يتمنى فيها ان يعود به الزمن حتى يرانى ويرى أننى لم اكن فقط أحبه بل اعشقه وعشقى نحت له تمثال يعبده .............وفى تلك اللحظه سأخذ نفسى بعيدا ....بعيدا عن الماضى وعنه وأحاول ان اعوضها ما فقدته وان اهديها ما تستحقه....ومن يحبها

تااااج رقم 2

بسم الله الرحمن الرحيم

فى الاول كدا بسلم على كل الناس واقولهم وحشتونى جدا خالص موت وبقالى كتير اوى مش بكتب حاجه ومش عارفه ايه السبب بصراحه بس كنت بكدب على روحى واقول انى مشغوله واه كنت مشغوله بس كان ممكن اكتب بردة....ما علينا المهم يارب تكونوا كلكوا كويسين وبخير وجود لاك ان شاء الله علشان بدانا الترم التانى ويارب يعدى بخير

بعد مشاورات ومناورات خدت نفس عميق وقررت انى اجاوب على التاج اللى مررته حبيبتى وصديقتى روفى وعلى الرغم انه تاج اسئلته جبارة جدا بس قولت لازم ولابد وحتما انى اجاوبه كفايه انه من رفرف:D

هل توافق على حذف خانة الديانة من البطاقة الشخصية ؟

مش معترضه على وجودها ولا معترضه على حذفها

المفروض ان التعامل مع الناس يكون بشكل طبيعى بدون تحيز دينى سواء مسلم او مسيحى دى فى المعاملات الرسميه

اما المعاملات الاجتماعيه مش محتاجه لبطاقه علشان اتعامل مع الناس المفروض التعامل مع البشر باعتبارهم ب ن ى ا د م ي ن

مش اديان

ما رأيك في المثليين ؟ هل ترى انها حرية شخصية ؟ هل توافق على الاعتراف بالمثليين ؟ هل لك اصدقاء من المثليين؟

مش فاهمه راى فيهم من اى زاويه بصراحه

طبعا حريه شخصيه لان كل انسان عارف ايه صح وايه غلط وقادر يحكم على نفسه وعلى ايه اللى يريحها بغض النظر هو ايه فى نظر الناس مش هنحاسب الناس كمان على اختيارتهم الجنسيه

اوافق لانهم اصلا موجودين اعتراضى او قبولى مش هيغير من واقع وجودهم

مليش اصدقاء ولا صادفت ناس منهم كويسه وينفعوا يكونوا اصدقاء ليا مش هعترض

هل تعتقد بوجود إضطهاد للمسيحين فى مصر؟

سؤال صعب

بس اعتقد الى حد ما لا لان المسيحين عايشين معانا وبيشاركونا نفس الواقع المرير اللى بنشوفه كل يوم وكل دقيقه.موجودين فى مناصب كتير دكاترة استاذة جامعين وحجات كتير اوى

لكن مرة قريت ان المسيحين مثلا مش مصرح لهم ببناء كنائس جديدة كالملسلمين وملهمش حق فى تجديد الكنائس القديمه الا بعض اجرائات معقدة جدا....بس فى راى ممكن علشان اعداد المسيحين مش فى تزايد متماثل مع تزايد المسلمين وبالنسبه للروتين مهو متفشى فى كل مكان فى مصر مش معنى دى يعنى

من هو الشخص الذى تختاره لرئاسة الجمهورية؟

بيتهيالى محدش مؤهل دلوقتى لرئاسه الجمهوريه غير شخص واحد بس لو كان اسمه مثلا جمال جرجس كانت ناس كتير تقبلته ووافقت عليه

اذا قمت بتأسيس حزب سياسي من هم الاشخاص الذين ستقوم بضمهم فى الحزب ليشاركوك الحكم حال فوزك فى الانتخابات؟

اممممممممممممممممم

هختار سعد زغلول رحمه الله

الجنزورى

طلعت حرب

ايمن نور

وكان نفسى اختار نساء سياسيات ليهم دور بارز فملقتش غير صفيه زغلول

هل توافق على مشاركة كل من الاخوان المسلمين و الاقباط فى الحكم؟

من حقهم يشاركوا فى الحكم بس بدون وجود اغلبيه لكلا الطرفين يعنى يكون حكم ائتلافى بينهم

في رأيك الشخصي ما هي اجمل مدونة قمت بزيارتها؟

يااااااااااه كتير اوى والله مدونين ومدونات كتير بجد مبدعين

بس فى مدونه برجعلها كل اما احس انى مضايقه ومخنوقه وبتابعها من بعيد لبعيد كدا هى

المدونه الكامييكازيه انسانه لصاحبتها ياسمين

هل توافقين على الزواج من رجل مطلق؟

والله حسب لو رجل بمعنى رجل ومناسب ليا سنا وخلقا وشخصيه يبقى معنديش مانع

إذا تزوجت و أنجبت ولدين و بنتين ؟؟ أى الاسماء تحب ان تسمىولدين وبنتين؟

هسمى الولدين:وحى ,أبى

ملحوظه(وحى بضم الواو وهى جمع كلمه وحى يعنى وحى + وحى+وحى__وأبى بردة بضم الالف وفتح الباء وسكون على الياء

والبنتين: سبيله وسلسبيل

هل تعتقد ان توريث الحكم فى مصر سيتم فعلا ام لا ؟

أينعم سيتم وبلا فخر

في رأيك الشخصي ما هو افضل إنجاز لحكومة مبارك ؟ و ما هو اسوء عمل قامت به ؟

فى الواقع:D

بيتهيالى كدا الكبارى عملتلنا بلد فوق البلد بصراحه وبردة محلتش ازمه المرور ودا انجاز فى حد ذاته

وبالذات انا وزملائى وزميلاتى اللى بنسافر كل يوم لكليتنا اشكر حكومه الرئيس علشان كوبرى قليوب اللى حل الازمه بتعتنا واحنا جايين القاهرة ونيلها تانى علشان بنعد ساعتين على نفس الكوبرى واحنا مروحين بيوتنا لانه بيتصلح...وعمار يا مصر

وبالنسبه لاسوء عمل فالعدد فى اللمون بصراحه متعدش:من ارتفاع معدل الفقر لارتفاع الاسعار لاحتكار الحديد لتفشى امراض الكبد والسرطان والاف بتموت كل يوم لاسباب لا تعد ولا تحصى ومحدش معير ....بس كدا واكيد انتوا عارفين الباقى

لمن تمرر هذا التاج؟

بصراحه اللى عايزة بالهنا والشفا

بس همرره للصديق والزميل أحمد زكريا صاحب مدونه ايوة شايفك

هو بيموت فى الاسئله دى هيفرح بيها اوى:D

فى عالم بدونك

غارقا يا أنا فى ذكرياتى معها

تحاصرنى عيناها هنا وهناك

فأغلق عيناى كى تغفل عنها ولو برهة

فأجدها فى أحلامى تقولى لى: أتريد نسيانى؟

اااااااااااااااااااااااه يا فتاتى

الى متى ساظل حبيسا فى سجن عيونك؟

ألن تسمحى لى بالخروج كما خرجتى انتى منى

ولكن لا...انى افضل ان أظل لكى على الرغم من انك لست لى

انى افضل العيش فى ماض دافء

بدل من مستقبل....بدونك

sOoRy

bgd iam so soory 3lshan i forgot you the last few days, the life and its stress made me forgot some one i supposed not to forget. I thought that it isn't enough to say " iam soory" to you bas, i felt that i have to say that in front of the all even these ppl dont even know you or me but it-may be- makes me feel better.bgd iam soory iam not gonna repeat it again in shaa allah.

msh tez3l meny:(

مسافرا يا قلب فى درب يدعى الحياه

مسافرا لا تدرى اين منتهاه

لا تعلم اى اتجاه يدلك على الهدايه

يحتضنك هذا وينبذك ذاك وانت بلا اراده

تمتلؤك الندوب حتى أحسست ان قربت النهايه

لكن....كفى يا قلب فأنت ملكى وتخصنى

ولن ينهى حياتك غيرى.....انا

لك الله يا مصرى

عشان انت مصرى

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

احمد فؤاد نجم

نفسى فى دمعه تنزل من عنيا

حتى الدمع بقى غالى عليا

فى ذكرى العشرين

اليوم اتممت العشرين عاما انهيت عقدى الثانى ولكننى لم أتمكن من تحديد اذا ما كنت سعيده اننى كبرت وزى ما بيقولوا بقيتى عروسه على الرغم اننى فى بعض الوقت اشعر وكأننى ما زلت طفله صغيرة تريد ان تلهو وتجرى بلا قيود تخنقها وسجون تحرمها منى ادنى حقها ..حقها فى الحريه

لم أكتب اليوم لأقول لنفسى كل سنه وانتى طيبه وعقبال زليون سنه والسنه الجايه تعملى كل اللى انتى عيزاه_علشان بسمع الكلام دا بقالى عشرين سنه متتاليه بلا توقف_لكن فى احتفالى الخاص فى ذكرى ميلادى العشرين وهو احتفال خاص جدا جدا ,احتفال متكون من نفس واحدة ألا وهى نفسى الوحيدة حاكيتها وتبادلنا العديد من الحوارات لم تكن حول ماذا تريد نفسى ان تكون السنه القادمه لانها لا تعرف الى متى ستبقى على هذه الحياه,ولم احدثها عما اذا كانت متقبله ما فعلته عن السنه الماضيه لانها مضت ولن تستطيع ان تغير شئ حدث فيها وانها لا ترى فى الندم من فائدة سوى عذابها....عذاب نفسى

كان حديثنا مجرد كلام يذهب ويجول فى طرقات عديدة ليس لها اى صله ببعضها الاخر وفى ظل حديثنا كنت استمع الى موسيقى لعمر خيرت والشيخ امام_حد هيقولى حد يسمع الشيخ امام فى عيد ميلاده ارد عليه واقوله فقريه تقول ايه_فاذا بأغنيه للشيخ امام تدعى ذكرى

انها تتحدث عن فتاه مثلى أتمت العشرين ايضا ولكن فى وطن لا يسمح بالاحتفال وتدب الفرحه فى قلب فى وطنها ووطنا......فلسطين

فى ذكرى الميلاد العشرين لفتاه من ارض فلسطين

وقفت تتامل حاضرها فى ارض يكسوها الطين

خلف الاشواك السلكيه عاشت اياما وسنين

ما بين الماضى وظلامه وحنينا فى القلب دفين

والحاضر فى بطء يمشى يمشى يمشى

مثقول الخطوااات حزين

لكن من اين المستقبل والشعب طريد وسجين

أتعيد فتاه مسكينه لتعمر أرض فلسطين؟؟

ام تأتى كالماضى الاسود بغزير دموعا وانين

أتحدى..لا يا مستقبل ساعود بعزم ويقين

وسأمسح عن أمى الدمعا أعطيها فى يدها سكين

وأرد الى خالى روحه وأعلق فى كتفه مدفع

أهديه الامل الوضاء أملى فى يوم ان نرجع

للارض المحبوبه ارضى للزهر النادى للوردى

ما عادت ترهبنى القوة فالقوة يمكلها زندى

بجد الاغنيه اكثر من رائعه وان تسمعها من الشيخ امام وقدرته الهائله على ان يجعلك تشعر بما يقوله من اول وهله ينطق بها بغناه الفريد

ما تغنى به الشيخ امام جعلنى أشعر بأنه لا داعى لى ان افرح فى هذا اليوم

فكيف أفرح وفتاه فى وطنى الاخر تستعد للقتال دفاعا عن وطنها

تاااااااااااااج

اول مرة يجيلى تاج وجالى من أعز الناس اللى عرفتهم بجد فرحت اوى اما فتحت البلوج ولقيت روفى بتقولى يا شيمو ليكى عندى تاج ومن كتر الفرحه كان هيوهمن عليا

دخلت وشفت التاج عند روفى وقد كانت الصدمه أن أن أن

اسئلته صعبه جدا وكلاكيع وحجات منبعجه على روحها بس قولت دى روفى حبيبتى عمرى ما هرد لها كلمه ابدا وأنفض للتاج اللى بعتته

بسم الله وبه نستعين

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم..واشمعنى.؟

بيتهيألى كنت هختار اعيش ايام الاحتلال البريطانى وبالذات وقت ثورة سعد زغلول لأن مصر وقتها كانت مصر واحدة بجد ايد واحدة

شعار الهلال والصليب مكنش حاجه علشان بروبجانده كان حاجه فعليه مش زى دلوقتى

كنا وقت الاحتلال عارفين ان مصر ليها عدو واحد الا وهو الاحتلال والحل واضح وهو الاستقلال

اما دلوقتى لا عارفين مين العدو ولو عرفناه مش عارفين هنخرج العدو دا ازاى.كانت الناس بتقاوم وجواها حب كبير لبلدها بس دلوقتى كله مكبر جمجمته وبيقولى هو انا اللى هغير البلد يعنى....

اول اولويه فى حياتك

عيلتك

شغلك

ولااصحابك؟

بصراحه التلاته مهمين جدا جدا جدا عندى بس طبعا الاولويه الاولى لعيلتى لأنى بحب بيتنا اوى وبعدها على طول اصحابى اللى استحاله استغنى عنهم

ايه اكتر حاجه بتحبها فى رمضان؟

ياااااااااه متعديش....بحب لمتنا كلنا ساعه الفطار وبالاخص اللى اننا زدنا واحدة علينا حوارت كل سنه بتتكرر فى رمضان وبردة بحبها

بحب اصوات المساجد وهى بتصلى كلها وبالذات ساعه الفجر وبتكون مليانه ناس وتحس ان ربنا بيتسقبلنا بطريقه تحفه

بحب الهدوء والسكينه اللى الواحد بيكون فيها فى رمضان وصعب يحسها اوى فى غير رمضان

بحب كلمه "كل سنه وانتى طيبه"اللى بتتقال 30 يوم فى الشهر

بحب الزينه وفانوس رمضان...على الرغم انى مش جبت فانوس السنه دى:(

اوصف ليا اجمل فطار ممكن تفطره؟

اجمل فطار كأكل كفايه يكون فيه بلح وعرق سوس لانى بعشق الاتنين دوول وبعد كدا كله زى بعضه

واجمل فطار اما بروح الحسين او اى مكان تانى مع اصحابى ونكون كتييييييييييييييييير ونفطر مع بعض ونصلى ونهيس مع روحنا بيبقى فطار جاااااااااامد جداااا

لو انت حاكم على مجموعه من الافراد هتكون عادل؟؟ طب هتعمل ايه عشان تتأكدانك حاكم عادل؟

و اكيد لو كانت احكم ناس هكون عادل فى حكمى عليهم محدش هيقول نفسى اكون ظالم وطبعا اللى يدوق ويجرب الظلم صعب يكون ظالم

اعمل ايه بقى علشان اكون عادل انى اول حاجه اسمع اللى بحكمهم وبطريقه مباشرة بينى وبينهم

حاول على قد ما اقدر انى اوازن بين مطالب الناس وبين السياسه اللى انا بتبعها

اللى بيبوظ الحكام نفسهم ولاالشعب؟ولا الحاشية المقربة؟

اول سبب ان حاكم يفشل انه يكون هو نفسه فاشل او مش كفء انه يحكم من الاساس

اما لو الحاكم دا محاط بحاشيه فاسده فأكيد هتخليه فاشل لانهم هيوصلوله معلومات غلط لمجرد خدمه اغراضهم الخاصه

مين أكتر اعلامي مصري بتحترمه؟

عمرد اديب,حمدى قنديل,منى الشاذلى

قريت ديوان عمر مصطفى صاحب بلوج تجربه(اسباب وجيهه للفرح) عن دار ملامح ولا لسه ولو آه ايه رأيك فيه؟؟

هو بصراحه مش قريت الديوان ولا البلوج

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

كنت اتمنى اكون بالرينيه(راقصه باليه)علشان بحب الباليه جدااااا

ايه تانى بلد تتمنى تعيش في بعد مصر؟

هو صعب انى اسيب مصر اصلا بس ممكن اروح اعيش فى دبى والاسباب وجيهه او اروح اعيش فى فرنسا

اوصف ليا ترتيبات اجمل فرح ممكن تحضره

بحب الافراح اللى بتكون الصبح اوى على الرغم ان عمرى ما حضرت فرح الصبح بس شكلى هحضر واحد قريب جدا

ويكون بقى فى جنينه كبيييييييييييييرة وادامى خضرة والعروسه تكون مميزة فى كل حاجه فى اليوم دا والعريس اخره بالبدله

وقبل كل دا لازم يكونوا بيحبوا بعض طبعا......وربنا يوفقهم وعقبال عندكم جميعا

بتراعي كلام الناس والقيل والقال؟لو اه او لو لا قول لى ليه؟

لا خاااااااااااااااااالص مكبرة دماغى من كلام الناس اللى مش بتريح روحها علشان لا هى عرفانى ولا عارفه انا بعمل ايه

يعنى مثلا لو روحت بيتنا متأخر الكلمه الوحيدة اللى هتتقال"دى صايعه دى دى دى" وممكن روجعى متأخر دا لاسباب كتيرة اوى غير انى اكون طبعا صايعه.فليه اوجع دماغى واتعب روحى فى حجات مش تهمنى وهتروح والناس هتلاقى حجات تانيه تتكلم غيرها

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

جدا جدا جدا جدا لبكرة كمان.بحس براحه اوى اما ابعد شويه عن كل التكنولوجيا دى واما بكون مخنوقه من حياتى اوى بقفل موبايلى ومبفتحش الكومبيوتر خالص والتليفزيون مش بقربليه وافضل مع نفسى كدا وبحس انى بعيد حسباتى مع نفسى وافكر براحه

بس ممكن علشان عارفه انى هفضل بعيد فترة وهرجع تانى لكل الحجات دى بس بجد مش بيكونوا وحشنى اوى فى العادى يعنى

السعاده هي

INNER PEACEاممممممممممممم حجات كتير بس اكبر سعاده بحسها اما بيكون جوايا حاجه كدا بسميها

بحس براحه ملهاش وصف كانى متصوفه كدا بس للاسف الاحساس مش بيستمر كتير علشان الدنيا اللى احنا فيها دى

بحس بسعاده فى فرحتى أمى بيا اما اعمل حاجه ترضيها

بحس بسعاده اما حد جمبى يحس بسعاده

عندك أمل؟؟أسبابك؟

اه الحمد لله عندى أمل فى ربنا كبير

علشان ملقتش اى نتيجه من انى أيأس او اعيش لمجرد انى عايشه واكل وانام واعد فى بيتنا,لقيت انى نفسى بتكون احسن اما يكون عندى أمل فى الدنيا,حتى لو مش حققت اللى انا بتمناه دا يكيفينى شرف المحاوله وكفايه انى جربت علشان مفضلش اقول يرتنى ويرتنى...

لما تحب تهرب من كل شئ بتروح فين؟

بدخل الشقه اللى بعد فيها لوحدى واقفلها علشان محدش يدخل عليا بحب كمان الاوضه بتعتى ادخلها وألم دباديبى كلها جمبى واحط سابى ادامى واكلمها

(بس سعات كتير بيكون نفسى اسافر ومن غير ما يكون حد معايا لاى مكان مش فارق بس للاسف مينفعش(اصلك بنت

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

هو بيتهيالى من 4 سنين حسيت انى كبرت اوى وشيلت مسؤوليه

بس فى نفس الوقت بحس انى لحد دلوقتى عيله اوى من جوايا بنتوته ضغننه بتضحك وبتلعب بس دا مش على طول

لما بتعمل عمل خيرى بيكون ايه هو دافعك الاول؟

اعمل اللى ربنا قالى عليه انى اكون خليفته فى الارض واعمرها مش بس انى اعبده واصلى واصوم

كمان احساسى انى فى ناس فى حاجه انا ممكن اقدمهالهم حتى لو الحاجه دى وقت بس

بحس بخير ملينى اوى اما ابوص فى عين حد محتاج وانا حققتله ولو جزء بسيط من الاحتياج دا

بتشرب سجاير؟لو الاجابه اه ايه شعورك لو شفت ست بتشرب سجاير؟وليه؟

الحمد لله مش بشرب سجاير

لو شفت واحدة بتشرب مش ببحلق واقول ايه دا عيب عليها لان السجاير دى مضرة للانسان سواء كان ست او راجل

لو الانسان بقى اختار بكامل ارادته انه يضر روحه هو حر بش مش هقول دى ست شكلها وحش بالسيجارة ودا راجل شكله زى القمر بيها

الامر سيان......شكلهم الاتنين بيها وحش

بتعرف ايدك اليمين من الشمال ازاي؟

سعات افكر شويه انهى واحدة باكل بيها او اشوف بلبس الساعه فى انهى ايد

لو انى زمان كنت بلبسها فى اليمين

ايه اكتر اله موسيقيه بتحبها؟

بحب الجيتااااااار جدا جدا جدا وكنت بتعمله بس كله رااااااااح

بحب العود اوى

فى رأيك ليه الذوق والنخوه اتعدموا؟

ممكن يكون استسلام الناس للموجود وانه مبقتش يفرق معاهم حاجه,كله دلوقتى بيقول نفسى ثم نفسى وكلمه انا مالى هو انا هغير الكون بقت الشعار الاساسى للناس دلوقتى باسثناءات بسيطه

ايه الحاجه اللى لو حصلتلك تبقى سعيد قوى؟؟؟

مش عارف حجات صغيرة اوى بتخلينى فرحانه جدا واحس انها حاجه كبيرة اوى فى حياتى

وحجات بتكون مهمه اوى ويتغير حجات فيا والمفروض انى انبسط اما تحصلى بتعامل معاها بسلبيه جدا

مش فاهمه ليه

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

ارض زراعيه طبعا

بحب الارض اوووووووووى بحب اخلى عنيا تشوف اللون الاخضر بيحسسنى ان بكره بنفس اللون بحب عينى تبص على الارض متجبش اخرها,كمان انا بقالى 4 سنين بسافر على ارض زراعيه من الاصول انى احبها

البحر و لا النيل؟؟؟

هما الاتنين بصراحه اختارهم

بس الاول عندى هو النيل انه بيمر من عندنا اصحى الصبح امشى ادامه وباليل اتمشى على الكورنيش بحب اركب مركب وتفضل ماشيه بيا جواه.بيحضن عنيا بحنيه جامده جدا

والبحر مش بحبه سعات وبخاف منه علشان خد من حياتى ناس بحبهم

مركب و لا طياره؟؟

مرررررررررررررررررررررركب

بس نفسى اركب طياره

مجنون و لا عاقل؟؟

فى الواقع انا حاسه انى فى العادى كويسه وبنت ناس يعنى

بس سعات كتير جدا اوى خالص بيعتبرونى مجنونه

ليه؟الله اعلم

تقرى كتاب و لا تتفرج عليه فيلم؟

اتفرج عليه فيلم

علشان تأثير الصوت والحركه المؤثرات دى كلها ليها تأثير كبير اوى على رأى الانسان انه بس مش هيحكم على رؤيه كاتب ووجهه نظره لا هيحكم بشكل أوسع من كدا

بتمرر التاج لمين؟؟؟

معرفش بلوجرز كتير علشان امررلهم التاج واللى اعرفهم عملوه

بس اللى عايز ياخده اتفضله بالهنا والشفا

!!!مبيعرفش

كنت مرة بتفرج على برنامج القاهرة اليوم وجت فقرة الصحافه وكان فى خبر" نسبه الطلاق فى مصر وصلت

الى %64 وان تلت اربع النسبه دى بين الشباب حديثى الزواج

ووقتها د.محمد الدش اللى كان بيقرا الاخبار -وبصراحه انا مش اعرفه_قال ان نسبه الطلاق ارتفعت بين الشباب حديثى الزواج لان شبابنا مش بيعروفوا حتى يختاروا

سعتها اضيقت اوى واترنفزت اما قال كدا ليه على طول معظم ومش كل الناس الكبيرة معتقده ان الشباب مش بيعرفوا يعملوا اى حاجه

مش بيعرفوا يعيشوا, مش بيعرفوا يختاروا,مش بيعرفوا يسمعوا موسيقى,مش بيعرفوا يتعلموا مش بيعرفوا مش بيعرفوا

طب ومين ربانا_باعتبارى من الشباب_؟؟ومين قال دا صح ودا غلط؟؟

ليه الفكرة عن الشباب دلوقتى ان كل همه فى دنيته دى انه يهيس ويهيص ويأنتم ويحب بنات ويمشى معاهم ولو بنات فريي شويه اللى هما دلوقتى كتير حبتين ينام معاهم بالمرة ويضرب ورقه ونخلص الحوار ويشرب ويضرب ويصيع وووووووووو

والناس اللى كل وقتها تقول انهم شباب بايظ ومتخلف ومنحرف وملوش هدف فى حياته مكلفوش نفسهم وتعبوا روحهم ولو دقيقه ويسالوا ليه احنا بقينا كدا؟؟

ليه مبقاش فى هدف يحركنا؟؟

ليه العتمه والخوف والحزن جوانا وملينا؟؟

ليه عجزنا وبقينا شويخ واحنا بيقولوا علينا شباب؟؟

ليه بنجرى ورا مخدرات وضياع علشان بس نفرح ولو دقايق ولو فرحه مؤقته؟؟

ليه اما نتسال عن حياتنا منلقيش الا كلمات كتيرة بمعنى واحد"ملل زهق ارف اكتئاب ؟

ليه بقينا نتريق على كلمه" انتوا المستقبل ونرد بكلمه_او عن نفسى برد بكلمه_اننا مستقبل ريحته وحشه واحنا مستقبل من غير مستقبل؟؟

مليون ليه جوايا ومش عارفه ارد بايه.اى سبب يخلينا بقينا كدا؟؟واى حل هيخلينا نكون المفروض نكون عليه؟؟

وهنفضل كدا كتير؟؟

ولا هنفضل كدا على طول؟؟

ولو فى تغيير المفروض ان كل واحد يبدئ بروحه ولا فى حاجه هتغيرنا كلنا باعتبار ان الاحساس واحد ؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

BE THE CHANGE YOU WANT TO SEE IN THE WORLD"GHANDI"