عمار يا مصر

دا والله الكلام دا عبط ايه لزمته مش فاهمه

لا وايه الشنط الكبيرة بس هى اللى بتتفتش والصغيرة لا كأن المتفجرات مش هتدخل فى الشنط الصغيرة

ياستى دول شويه موظفين قاعدين على مكاتبهم ومش لاقيين حاجه يعملوها قالوا ننزلهم يتحركوا شويه ويقرفوا الناس

لا وايه الراجل يقولك حلو اوى انهم بيفتشوا الحريم وسايبين الرجاله.يلا يبهدلوهم شويه بقى

دا حوار ما بين اتنين ستات فى المترو النهاردة الساعه 2 وكنت قرفان من الحر والجو بطريقه كنت حاسه انى هطلع دخان من قفايا

المترو الايام دى بقى موز موز موز

نظام ملوش حدود احترام لوقت الناس بطريقه أدهشتنى انها موجوده فى بلد الامن والامان بلد السبع الاف سنه

موجود فى بعض محطات المترو ومش فاهمه ليه مش فى كل المحطات احتمال القاعده محدده الاهداف التى هتضرب فيها محطات المترو زى محطه جامعه القاهرة اللى بتبقى عامله زى طابونه العيش البلدى فى اى منطقه شعبيه

تلاقى موجود على باب المحطه شحطين تلاته قاعدين على الكراسى والناس تقف صف مش مصفوف عادة المصريين ولا هيشتروها

والناس تفوت على البنى ادمين اللى قاعده دى وتفتح الشنط واللى يغيظك ويحرق دمك انهم اصلا مش بيفتشوا جواها مجرد انهم يفتحوها وينعكشوا وبس...............ليه معرفش

ويا حلاوة يا ولاد لو الحلو الجمر اللى قاعد لقى موزة معديه عليه. تفوت من تحت ايده؟؟استغفر الله

لازم طبعا يديلو كلمه كدا تحسسه انه انسان ناقص ومش راجل اصلا

لالا واللى يخليك تموت من الضوحك ان الناس مش بتعدى من الجهاز اللى بيكشف اذا كان معاك متفجرات ولا لأ لا

لا بيعدوا من جمبو.................ناس حويطه برده.الجهل نور والعلم ظلام

بجد هنقول ايه؟؟؟

هو احنا ناقصين تخلف طول عمرنا بنقلد الكويس بتاع برة ونيجى نقلده غلط وبمنتهى الغلط

مترو ايه اللى ناس تقف تفتش اللى بيدخلوة فين التفكير انك تفتش الاف والاف داخله كل يوم تركب المترو

اااااااااااه يا بلد حالك ماشى بالمقلوب

مواطن متهان

وحرامى متصان

لا حد قادر يقول لا

ولا حد قادر يقول الاااااااااااه

((يبقى انت اكيد اكيد فى مصر))