ما احلى الرجوع الى بلوجى

يااااااااااااااااااااااه

بقالى فترة مش فتحت البلوج وجبت نيو بوست وافتح صفحه بيضا كدا واجيب الزبادى واكل واكتب والون الصفحه البيضا بكلامى وباللى انا عيزاه اعدت اقول يابت يا سميلى تكتبى ايه ايه ايه وفضلت ادور فى معاميق معاميقى وادور وما زال البحث مستمرا واتوغل وانتشر وانتشر واتوغل وملقتش غير انى مضايقه حبه وزعلانه حبتين ونفسى اطفش بره بيتنا تلت اربع خمس ست سبع حبيات

طب اكتب انى مضايقه وهقرف الناس معايا ليه حد ناقص بلاوى,طب اكتب انى زعلانه وايه الجديد عاااااااااااااااااااتى جدا بقى الطبيعى بتعنا,طب اطفش من بيتنا مش لاقيه مكان اطفش فيه بالله عليكو لو حد لاقى مكان يقولى عليه ويتصل بيا على 015 من 6 صباحا ل6 مساء وعلى المقيمين خارج القاهرة مراعاه فروق التوقيت

خلاص بقى يا سميلى ايه أم الرغى اللى انتى فيه دا ادخلى فى صلب الموضوع....حلوة صلب دى فكرتنى بأحمد عز تؤتؤت مش الممثل يا جهله بتاع ال40 مليار دولار وهو فى الاربعين من عمره_لو انا غلط فى الارقام حد يصحح علشان مبحبش اغلط فى الناس الكوباره

المهم هحكيلكم على تلات مواقف احتمال ملهمش دعوه ببعض بس حسيت انهم مترابطين اوى اوى ببعض ومحدش ينام فى النص اسمعونى للاخر واكيد مع سميلى مش هتقدر تغمض عنيك

:D

المكان:بيت طنط سناء

الزمان:يوم الاثنين

الحدث:سبوع لانا بنت أن

وانا لسه داخله البيت لقيت بقى مين؟مييييييييييييين البت دعاء بنت سناء اللى كانوا جيرانا من زمان وعزلوا بس دعاء ميقتش دعاء بقت ايييييييييه موزة موزة يعنى حطالى عدسات لاصقه ومايك اب اوفر ولابسه برموده قال برمودة قال الله يرحم الجيب شورت القطن اللى كانت بتنزل بيه الشارع من 10 سنين

هنقول ايه............زمن

المهم سالت ويرتنييييييييييييييييي ما سالت تهورت بقى وسالت دعاء فى ايه؟كان مجرد سؤال ومكنتش مجرد اجابه

دعاء فى صيدله جى يو سى

مش عارفه تنطق يعنى الجامعه الالمانبه

وطلع الحاج ابو دعاء بيدفع 80 الف جنيه مساريف كليه دعاء

و20 الف جنيه مساريف فيلا الرحاب اللى ساكنه فيها دعاء

و5 الاف جنيه مساريف الاتوبيس اللى بينقل دعاء من الفيلا للكليه

يعنى 105 الف جنيه مساريف دعاء للكليه بس غير مساريف دعاء الشخصيه يعنى درس يا بابا كشكول يا بابا ايشارب يا بابا وادفع يا بابا

يعنى 105 الف فى خمس سنين 5 فى 5 25 خمسه ومعانا2

يعنى بعد الجمع والطرح والضرب والذى منه ابو دعاء بيدفع 525 الف جنيه علشان دعاء تبقى دكتورة دعاء!!!

والنبى انا اتكسفت اقولها انى فيبس لتبصق عليا ولا حاجه

وفى النهايه سؤال يطرح ذاته:

هل تستطيع دكتورة دعاء باعتبار ما سيكون ان تجنى مالا بقدر ما الحاج ابو دعاء انفقه عليها؟؟

سؤال ليس له اجابه الا فى بلوج سميلى مستقبلا لو عشنا وكان لينا عمر

وفى نفس المكان والزمان والحدث لقيت البت اييييئ او اسراء يعنى ضحيه من ضحايا الثانوى والتنسيق والمجموع اسراء ادت للتنسيق الوش الجبس وقررت تدخل اى كليه خاصه وقد كان.

شد اونكل ابو اسراء الرحال الى مدينه السادس من اكتوبر العاشر من رمضان وبدات رحله البحث وحدثت الفاجعه

اسراء مش لقتلها مكان فى اى صيدله فى اى كليه خاصه وقال ايه كان لازم تحجز مكان الاول راحه انا كليه ولا راحه عياده دكتور اسنان علشان احجز قبل اما ادخل.ويعينى يدوب لحقت علاج طبيعى فى جامعه 6 اكتوبر,لحقت علشان تدفع ب20 او30 الف جنيه,لحقت علشان تشترى شهادة الدكتورة

وفى نفسى اليوم روحت بقى علشان قولت كدا كفايه عليا اوى

روحت دخلت على ماسنجرى وكلمت اليرون وروفى_روفى دكتورة بس من بتوع الحكومى مش الخاس_ والواد اليرون كان بيحكى ان واحد صاحبه بيفكر هو كان بيفكر مجرد فكرة عابرة انه يتجوز زى خلق الله

يتجوز ومعهوش فلوش ولا شقه ولا ولا ولا ولا

وهلم جرة والجرة فاضيه والواد عايز والبت عايزة

ومحدش حاسس بالمصيبه الجايه

كدا خلاص خلصت ال3 مواقف .....ايه دا انا نسيت الرباط اللى بيربط ما بينهم حد ينزل يشترى ربااااااااط بسرعه

لالالا خلاص افتكرت

الحاج ابو دعاء بيدفع اكتر من نص مليون علشان يعلم دعاء بس بس النص مليون جنيه دول يجوزوا كاااااااام واحد وواحدة؟يبداوا حياه كام واااااااحد؟؟ولو حد مثلا قرا البوست اللى اانا كتباه دا واتخرج مثلا ومش لاقى شغل ولا عارف يتجوز ويبدا حياه ايه احساسه تجاه الحاج ابو دعاء؟؟ولو روفى مثلا قابلت دعاء وروفى ذاكرت فى ثانوى لحد ما البوق بوق اللى جوه عنيها ماخرج منها وجابت مجموع وبقت دكتورة ودعاء فلوس الحاج ابو دعاء هى اللى هتخليها دكتورة ومن غير ما تتعب روحها اوى احساس روفى تجاه دعاء ايه بقى؟؟

واسراء بتحجز علشان تدفع اكتر علشان تبقى دكتورة فى زمن الدكاترة فيه اكتر من الناس العيانه اصلا,بتحجز علشان حد يحقد عليها ويقول هم دول بقى الناس اللى معاهم فلوس واحنا ولاد....بنشحت فلوس

حسبييييييييييييي الله ونعم الوكيل

حسببببببببببببي

خلاص حسبنت كتير يا حاج