شلااااااه يا حسين

النهاردة كنت فى الحسين انا وأصحابى مجرد خروجه فى مكان جميل وقديم واننا نشوف مسجد من المساجد الكبيرة فى مصر, وفرحت اوى انى هروح علشان من زمان مروحتش الحسين.اول ما روحنا دخلنا المسجد نصلى لقيت مناظر عجيبه كأننا فى _مش هقول فندق او اوتيل_بانسيون من بتوع السيده اللى بشفهم فى الافلام بتاعت زمان ناس نايمه على الارض وبتاكل رز مع الملايكه ولا هى حاسه بأى حاجه من هيصه الناس ودوشتهم وصوتهم العالى كانهم فى سوق مش مسجد اللى هو بيت من بيوت ربنا يعنى ندخله علشان نذكر ربنا جواه مش نجيب سيرة ام احمد جارتنا ساعه ما اتخانقت مع ام زينب علشان مش عارفه ايه ومش عارفه,واللى اكتر ويفقع المرارة اكتر ماهى اصلا مفقوعه تبص يمين تلاقى اللى جايبالك فول وطعميه وجرجير وعماله تاكل وتلظ جرجير جرجير جوة الجامع ,تبص شمال اللى جيبالك طبق كشرى من اول الحسين وعماله تضرب فيه_قاعده انا فى مسجد الحسين ولا عند جاد بتاع الفول_

سبتنى من دول وقولت كل واحد وعلامه

لقيت مكان كدا اللى هو المقام قولت ادخل اشوفه _بس طبعا من غير ما افضل الف حوليه وسيدنا الحسين جالى فى المنام ندانى ولبيته يا سى السيد_لقيت اللى مسكالك فى سور المقام كأنه حته من الجنه نزلت على الارض ونفسها تنط جزة السور وتلزق فى المقام وعماله تدعى وتدعى وشلاه يا حسين كأن الحسين دا همزة الوصل بين العبد وربه ويريت كانوا ستات وبس _اهو زى ما بيقولوا ناقصات ...ودين_الستات فى كوووووووووم والرجاله فى كوووووووووم تانى غيره خالص مقدرتش افهم حتى ايه اللى بيعملوه دا مش ممكن درجه قله الدين انك تتمسك بمقاااااااااااام والله اعلم اذا كان الحسين جثمانه موجود فى المسجد ولا لأ_فى قيل وقال فى الموضوع دا_

دا غير الاحتياطات الامنيه اللى احنا عملناها على الشنط بتعتنا واحنا داخلين واحنا جوه الجامع ماسكين الشنط كانها عيل من عيالنا اللى لسه مخلفنهوش ,واحان بنصلى حطين الشنط جمبنا وش كدا لتتخطف ولا حاجه محدش ضامن روحه الايام دى الاحتياطات دى حسستنى انى واقفه فى محطه مصر مش فى مسجد ويجيلك بقى طقم الناس اللى بتشحت,قاعدين لا بينا ولا علينا لقينا واحدة بتتسحب جمبنا وبتتكلم بتقولى ايييييييييييييه؟؟؟؟مش سمعاكىيا حاجه؟؟؟؟؟؟؟؟؟؟؟المهم طلعت عايزة حاجه علشان تركب بيها وتروح.تركب من جوة المسجد نفس الكلام نفس الاسطوانه المشروخه يا حاجه بعد كدا الاذان أذن واقيمت الصلاة قد قامت الصلاة والحاجه قاعده لا بتقوم ولا بتصلى(ماتت دى ولا ايه

مش هتقومى تصلى يا حاجه-

....................-

يا حاجه الامام اقام الصلاه-

........................-

بالسلامه يا حاجه

بعد الصلاه ما خلصت قررت انى اروح اتكلم مع الناس اللى كل يومهم قاعدين فى المسجد وخلااااااااااص,بس للاسف ملقتش الحاجه اللى مصلتش تلاقيها كانت بتعمل جوله وتشوف رزقها فى الليله دى,قومت سايبه اصحابى قولتلهم خمسه وجايه

سلام عليكم-

وعليكم السلام-

ازيك يا حاجه عامله ايه؟؟-

الحمد لله يابنتى كويسين-

انتى منين يا حاجه؟؟-

بصراحه مش فاكرة قالت منين بس هو مكان بيتهيالى اسمه قلعه الجيش

وانتى منين يا عسل؟-

انا من المنصورة-

احسن ناس والله ناس جدعه وزى القمر-

ربنا يكرمك-

وبتيجى من المنصورة علشان الحسين؟-

لا يا حاجه انا بتعلم هنا وباجى للكليه بتعتى-

ربنا يحميك يابنتى ويوفقك ويكرمك باذن الله-

انتوا بتيجوا كل يوم هنا يا حاجه؟؟-

اه بنيجى كل يوم-

بتعملوا ايه هنا كل يوم؟؟-

بنخدم الجامع سيدنا الحسين-

بس انتوا قاعدين طول النهار لا بتخدموا حد ولا بتعملوا حاجه-

ما احنا بنيجى نصلى نيجى من الضهريه كدا-

بس اللى يجى يصلى ميقبلش فلوس من ناس ميعرفهاش؟؟ -

احنا مبنطلبش من حد حاجه اللى عايز وربنا مقدره بيدينا كمان احنا ناس غلابه انا عندى اربع عيال وهى كمان ومفيش حد بيصرف علينا -

مش بتشتغلوا ليه يا حاجه؟؟-

ومين يابنتى هيشغل ناس زينا كبار كدا دا احنا عايزين اللى يخدمنا-

فى المدارس يا حاجه؟بتعليمهم؟-

انا عندى اتنين فى المدارس واتنين لا وهى برده بتعلم ولادها انا عندى بنت زيك كدا -

ربنا هيعوضك خير فى بنتك دى بس انتى اصبرى-

وانا كمان عندى رحاب معسله كدا زيك وطيبه-

وجات شيرى تطمن عليا علشان اتاخرت فى الكلام معاهم وبتحسب ضربونى ولا حاجه

يلا يا سميلى فى ايه؟؟-

دقيقه يا شيرى مش هتأخر

وببوص للحاجه لقيت عنيها مليانه دموع وبتعيط كأنى فكرتها بهمها اللى عايشه فيه ونعكشتلها فى حزنها اللى نايمه صاحيه عليه,فضلت اقولها انى اسفه اوى انى فكرتها وزعلتها وهى تقولى لا متخديش فى بالك احنا كدا على طول واهى عيشه انا حزنت على حزنها وفضلت اعتذرلها انى مقصدتش حاجه وطبطبت عليها وبوست دماغها وبوستها وقولتها "ادعى لربنا انتى فى بيته اشكيله همك وحزنك محدش

"هيحس بيكى اكتر منه احنا فى زمن محدش دارى باللى جمبه بس ربنا يعلم ايه فى قلب كل واحد وربنا هيقف معاكى ان شاء الله

ومشيت وفضلت تدعيلى بدعا اتمنى انه يتحقق وربنا يسمع منها ويتقبله كأنى ادتها حجات كتير مش مجرد انى اتكلمت معااها كلمتين وطلعت شويه مع حد متعرفوش اللى فى قلبها.خرجت من المسجد وواحدة صحبتى قالتلى يابنتى دول ناس بتستسهل بيقولوا نيجى نعض هنا ولا حركه ولا شغل ولا بتاع وادينا بيجلنا فلوس مش بطاله وببلاش

فكرت قولت ممكن بس ايه يجبر ناس على انها تذل روحها وتقلل من كرامتها وتيجى تعد فى جامع تاخد منى ايد دى وايد ترملها حاجه وايد مترملهاش

بس اللى خرجت بيه انى خرجت وانا اد حزينه على امهات فى سن امى وممكن جدتى كمان وبيتبهدلوا كدا ناس المفروض انها ترتاح وبتتهان ناس مش لاقيه تاكل يوم بيومه وناس تانيه...............ولا بلاش اقول ابقى اقول لما اقابل حد معرفوش زى الحاجه ما قالت وفضفضت..وحزنت على زمنها قبل ما تحزن على حالها